منتديات المُنى والأرب - محمد اسامة ابو سلامة .... حطة وبطة

طول عمري لآجئ و حامل كرت المؤن
و في يوم رحت على المؤن
أستلم كبونتي لقيت دور طويل عريض على الشباك
قلت فش مشكلة
بقعد و بستنى دوري
لقيت راجل كبير قاعد و لابس حطة
قلتلوا شو رأيك يا ختيار أحكيلك قصة الحطة
قلي هو انت بدك تجنني
خلينا بكفيا همنا
قلت إلو لأ
إسمع مني قصة الحطة
قال هات إحكي يلا الدور طويل و بنسمعلك
قلتلوا كان في بنت اسمها بطة لمرة إسمها إم حسين
كانت بنت اسمها بطة لمرة اسمها ام حسين
قلي هوا انت بدك تجنني
بدك تحكيلي قصة بطة ولا قصة الحطة
قلتلوا ما هي بطة إم الحطة
إم حسين ولدتها
و طلعت بطة على الدنيا ما شافت ابوها
و في يوم بطة راحت على السوق تشتري حطة
سألها البياع إنتي إلي زيك ما شاء الله عليكي حلوة
بدل ما تقول لي شالة او منديل بتقوليلي حطة
قلتلوا هو انت مش عارف قصة الحطة
طيب اسمع لمن احكيلك قصة الحطة
انا اتربيت لإمي وحيدة
ربتني دمعة على دمعة
صحوة على نومة
لمن كبرت و صرت بطة
قالها شو العبرة بالحطة
قلتلوا أصلوا طول عمرها إمي شايلة صورة لراجل لابس حطة
و لو قلتلك وين مخبيتها مش راح تصدق
قلها وين ..؟
قلتلوا في غرفتها
في الصالون
تحت مخدتها
بين غطاها و فرشتها
حطاها في المطبخ حتى الصورة تشم ريحة طبختها
قلها أكيد ابوكي
أكيد صورة أبوكي
قلتلوا لأ
أنا سألت إمي نفس السؤال
هذا ابوي ..؟!
قلتلي لأ هذا مش أبوكِ ..!
هذا أبوكي و ابوي
و أبو كل الغلابة
ابو الوطن و المهجر
ابو الزمن هذا و الزمن إلي جاي
ابو الزمن هذا و الزمن الي جاي
بطة شرت الحطة و لبستها
زي عروس في ليلة حنتها
مشيت و كأنو غزال ماشي على الأرض
شافوها العصافير لحقوها
شافوها الشباب لحقوها
و إغصان الشجر على جنب الطريق غنت و قالت
حطة يا بطة نام و اتغطا
حطة يا بطة نام و اتغطا
حطة يا بطة نام و اتغطا
و فجأة …….!
طلعوا عليها غربان
غراب بشد في إيدها
و غراب بشد في رجليها
و غراب بنزع عنها سترتها
و عشرين غراب بشدوا عنها حطتها
فكرك قدروا ينزلوا عن راسها حطتها …؟!
فكركوا قدروا ينزلوا عن راسها حطتها …؟!
و صارت مسيرة كبيرة
صارت مسيرة كبيرة
و صبيان الحارة طلعوا
إشي حامل حجر
و اشي حامل علم
و إشي بجيب سلاح
و اشي بلم جراح
و من حارة لحارة
و في بحارة جنب حارتنا
طلعت مسيرة أكبر
و طلعت إم ابراهيم
من ورا بابها القديم
سألها المختار
قلها إيش في ..؟!
إيش في يا إم ابراهيم ..؟
قلتلوا هو أنت مش عارف ايش القصة ..؟
القصة قصة بطة
قلها مين بطة ..؟
قلتلوا بطة إم الحطة
قلها شو بطة و شو حطة
ايش المشكلة يا ام ابراهيم فهميني
قلتلوا بقولوا في حارة جنب حارتنا
راحت فيها بنت اسمها بطة
تشتري حطة
و طلعوا عليها غربان
ايشي بشد في إيدها و ايشي بشد برجليها و عشرين غراب شدو عن راسها حطتها
و ما قدروا يشيلوا عن راسها حطتها
قلها هي المشكلة في بطة ولا في الحطة ..؟
قلتوا المشكلة في بطة و في الحطة
الحطة يا ختيار
كل الناس عرفونا منها
الغريب و البعيد و القريب عرفونا منها
الحطة يا مختار
لفت من بلد لبلد
من دولة لدولة
هجروها
رحلوها
مرة من عند ابن عمنا بشار
و مرة من عند ابن عمنا حنا
و مرة من عند ابن عمنا ابو عبد الله
لفت بلاد بلاد بلاد و رسيت في حارتنا
طيب فكركوا سابوها
لا و الله المية و شوفت الناس حرموها
حاصروها
في المقاطعة
حاصروها
الموت يشد و الحطة تشد
الموت يشد و الحطة تشد
الموت يشد و الحطة تشد
الموت يشد و الحطة تشد
مين مات ……. ( مات الموت )
مين مات …….. ( مات الموت )
مين مات …….. ( مات الموت )
مين مات …….. ( مات الموت )
لأنو الحطة هي الشعب
و الشعب ما بموت

لأنو الحطة هي الشعب
و الشعب ما بموت
و راحوا صبيان الحارة
لإم حسين
يقلولها بنتك بطة الغربان لحقوها
شدوا بإيديها و شدوا برجليها و نزعوا عنها سترتها
و كان عشرين غراب بشدوا في حطتها
و ما قدروا ينزعوا عن راسها حطتها

قلتلهم

قلتلهم
كل هذا علشان الحطة
طيب استنوا عليا شوي
دخلت ام حسين على بيتها
و طلعت من جوا بيتها
حاطة على كتافها حطة
و شايلة صورة الراجل ابو الحطة

و قالت قولوا لكل الناس
قولوا للأطفال
قولوا لشباب
قولوا لصبايا
قولوا للختايرة
تلبس حطة … تلبس حطة …. تلبس حطة ……