|
شعر وشعراء من التراث التونسي
شعر من التراث التونسي قسيـــــــــم عوارم ردة بردة ساعات يتيه الخاطر في غبطة الغناء و يطلع صوتي صادي في شامخ القبب تنشرح أفكاري و بالوجد ننتشى بجوانحي نتعلى مسكون ننطرب بسر أمر الداعي ننساح للسماء يفيض بحر الهيل بامواج تسطخب تنطاعلي القرايح مترادفة سواء تتناغم المعاني متعادلة خبب من فكرها و الداعي لكدار تنجلى تنسابلي القوافي و ينهالـّي السبب و ساعات نبكم نخرس من عبرة البكاء تنطفي حنجرتي و الصوت ينسلب لا نحس برجفة في غارق الحشا و لا بهمس مرادي في ظلمة الحجب تنحبس افكاري و نفقد الرجاء نصير شاحب راشي كما عتقة الخشب خامدة نيراني سامورها انطفاء نستعر دخلاني بلا سارج اللهب لا صواب بقالي و لا عظم ما رشا سدوتي خبيلة لا نير لا مكب. آش يفيد الملام في قلب المظام للحاج عثمان الغربي من شعراء الحاضرة مولود عام 1870 و خالط الادباء الكبار و سمع منهم و اتشغف بالغنا و الشعر و زيد متعلم بدا تجربته و هو أول من عطى مكانته للادب الشعبي كيف أصدر جريدته "المضحك" عام 1911 في وقت ربما كانت الدنيا ما فيها شئ يضحك. و بعد ما وفات الحرب العالمية الأولى خرّج جريدته الشهيرة و المعروفة في الأوساط الفكرية و الشعبية التونسية "الزهو" اللي كانت مقسومة شئ عربي بالفقهي و الشئ الآخر بالفلاقي و جزء كبير من الموروث الشعبي التونسي ما رى المطبعة بعد اعمال بعض الباحثين و الرحّالة كيف الألماني فان شتوم و الا صونّاك الفرانساوي، إلا عن طريق جريدة الزهو اللي نشرت مالجملة للعربي النجّار و أحمد بن موسى و أحمد ملاك و عبد الرحمان الكافي و غيرهم. و هالجريدة كانت عندها ميزة طول هي الوحيدة اللي تتميز بيها، أنها ما تتطبع كان على ورق ملون موش كي بقية الجرايد على ورق أبيض الشئ اللي يخلليها سباقة في باب المركتينق بحكم حتى اللي ما يقراوش يقولو للبياع أعطينا الجريدة الغبرة و الا الخضراء. و الزهو من الجرايد التونسية اللي عندها دوام و عمر طويل في وقت اللي المغامرة الصحفية تعتبر باب من بيبان الفلس و قلة التدبير و ثمة جرايد ما تدومش لأأكثر من ثلاثة و أربعة أعداد. جريدة الزهو توقفت عن الصدور عام 1963 وقت اللي الضحك ولـّى مزعج و يقلق شوية. القصيد اللي اخترتهولكم هو من أجمل ما غنات المرحومة بنت دشرة نبّر صليحة و من ألحان الشيخ خميس الترنان. القصيد جا في ميزان الموقف المربع الخفيف و اللي أهم أنه في نظمه نلقاو آثار الخيال الشعري الحيطي يحب يقول اللي مربوط بالحواضر و كذلك نلقاو فيه الترصيع اللي يحبذوه شعراء القرن التاسع عشر ببعض الألفاظ اللي هي من الفصحى و هي اللي اللوغة كذلك اللي نلقاوها في بعض المراسلات و الا المذكرات كيف مذكرات علالة بن الزاي. من الكلمات المرصعة في هالموقف: نلقاو وجد و سجام و الأنام و الثغر و ليس و كم و الخصر و الذمام. و نلقاو كذلك فيه تشابه كبير في الصور و المفردات الشعرية الشائعة في الملحون المغربي غند الغرابلي و الشريف بن على و المدغري و قدور العلمي الشئ اللي يأكد على وحدة النابع الجمالية و القيمية للتراث الشعبي المغاربي. نتمنى اللي صديقى سمسوم عندو التسجيل يمتعنا بيه و كيما العادة انشالله تكون أفكارنا متواترة آش يفيد المــــلام *** في قلب المضـام اللي ملكو وجد الغرام *** و الداعي حرقـو * و ساهر طول الظــلام *** ما يهجع و لا ينـام و دموع عينه سجــام *** على الخدود دفقــو * و قلبو بين الأنــام *** من ليعته هــام ليس صبت نجّــــام *** و سقامي ما عتقــو * من طلعو كما الاعلام *** بغثيث ريش نعام و جبينها في الظلام *** سيرني برقــو * و حواجب يا سلام *** كيما نونين أقلام و عيون مثل السهام *** في قلبي رشقــو * و خدود ورد انـام *** مفتق من الأكمام و الثغر بابتســـام *** يا ماحلى نطقــو * و رقبة جدي اريام *** بجماله رجــام و الخصر و الحزام *** ورد على ورقــو * القــد كالاعـــلام *** في عسكر و قــوام يرعى و ليه الذمام *** حل اللي خلقـــو * سحرني بأميــام *** صابر كم من عــام نقرا مني الســـلام *** على الناس إن عشقــو برق، و هيلا هيلا يا مطر... في مدونة الشعر الشعبي التونسي بتحديد و في بلدان المغرب بكلها ياخذ غرض وصف الطبيعة منزلة مهمة و كبيرة الى جانب الشعرالاخضر و صف المرى.الثلاثية المعروفة بالبرق يحب يقول وصف المطر والنجع اللي هو وصف المرباع و الخروج للبادية في فصل الربيع كي يكون العام ماطر، و الكوت اللي هو وصف الخيل و الفرسان و خصالهم في المعارك، هي الاغراض المحبوبة عند الشعراء و الغنَّاية. هدية متواضعة لصديقة مدونة تهابش في توة أيامات شاهية على مطرة تغسل الدنيا و تفرهدها. من موقف للطالب محمد العياري و هو من المعلمية الكبار و يرجع لاولاد عيار و شعراء وقته (نهاية التاسع عشر) عطاووه رتبة الطالب. اخترتلها هالمقطع انشالله يعجبكم و يعجبها. و الطالب معروف أكثر بأشعاره الغزلية من نوع القسيم و المسَدَّسْ اللي كتبهم على فاطمة و مالجملة يقولو الروات اللي كتب ما أقلّش من ميات مسدس على اسم فاطمة و هاو راس ركاب مسدس منهم: على فاطمة وشام باهي منزل *** و عون تقتل***و غثيث فوق التراقي مخبِّل برق الطالب محمد العياري شيِّر شرع بين الأمزان*** و يتوق توقــــان يومي و يسطع بضيان*** في عاقب الليل الأظلم وقت ان صعد قام الآذان*** في القوس ديَّــــان شالى بالانوار يزيـان*** مابهاه وقت ان تبسم ما بين الافلاك سرعان*** خفيف لعجــــان ينْقَدْ يعواج يليـــــان*** تحت الحجب كيف علـِّم دوي الرعد ماقواه صديان*** و يزف زفـَّـــــان قالق و حامق و حرجان*** يطرشق يزلزل يقمقـم درز في السماء زاد غليان*** و ينق نقـَّــــــان حارج و مادِّيه غيوان*** دكـِّم سحابه و ظلـَّم بدات المطر غير زفـَّان*** و تصب صبَّـــــان و تدرِّكت فوت ما كان*** و الريح قبلي اتنسِّــم و الرعد في مثل شوشان*** يبكي بالاعيـــــان عجمي مغشش و غضبان*** من ضرب سيده مطمطم نحزيه و نظن ظنـَّان*** كما فارس افتــان فزَّع عساكر و قومان*** بالهند فيهم يجمجـم منه اتدلـِّت الفرسان*** و مشات طشـَّان صنديد دقـَّاق بالزان***للحرب كوته ملجٍّم .......و القصيدة ما زالت طويلة محل شاهد أحرش للعرف أحمد بن موسى: آش في وجوه الكلاب ما تشوف إذا جيت و صبتني متغشش *** كون متأدب ما تصيغ كلوف و إذا تلقى خاطري متهشش *** جـاوبني بجـواب بالمعـروف البليد تلقاه ديمة يبربش *** و امّا الحر دايما متحوف يفهمك دوب العيون ما ترمش *** من كثر فهمه من قفاه يشوف طيور السما في كل بر تعشش *** ما ينزلوشي المنزل المكشوف إيّاك في وسط الجموع توشوش *** أهل الأدب ما يفعلو محذوف بالسيف إذا خاطري يتنعوش *** ندفع كلامي مثل ضرب سيوف مثل ما قال القنفود وقت استخوش *** في وسط شوكه مكمّص و ملغوف قالو ليه الناس علاش مكمش *** قال آش في وجوه الكلاب ما تشوف قصيد للمرحوم الشاعر احمد بن موسى سعاني هوى العازبة لين حرصني***كبسني دهسني حبس حسني هسسني لين ترسني *** سعاني هوى العازبة لين صلبني*** رعبني شغبني عطب طبني كبني لين قلبني ضرب هبني لين غلبني*** نكبني نهبني تفصَّلته ثوب بدنه لبسني *** سعاني هوى العازبة لين حدفني*** ندفني صرفني شغف طقـّني لين خسفني ردف سفـّني قفنـّي داه يفني*** خطفني صرفني كما الملح من تحت كفـّه مرسني *** سعاني هوى العازبة لين قطعني*** تبعني فجعني صدعْ قعّني وعنـّي لين خلعني مضى دعّني جعّني خذعني*** زرعني صرعني تقوّى على كل جيهة وكسني *** سعاني هوى العازبة لين دمغني*** صدعني صبغني طغى معـّني رغـّني لين فرغني صرغ دغـّني جغـّني لين صبغني*** فرغني مضغني ترودس ردس حطّ ساقه عفسني *** سعاني هوى العازبة لين غصرني*** جمرني قهرني تنومر نمر مرّني ما عذرني صدم صرّني جرّني ما عبرني*** نشرني عصرني ترصّدت على قرب سوحه عكسني *** سعاني هوى العازبة لين درزني*** نغزني عززني درز لزّني هزني لين قلزني حرز حزّني مزّني ما فرزني*** حززني قززني كما هايشة حط لسنه لحسني *** سعاني هوى العازبة لين مكثني*** نكثني ندثني بحث حثـّني لين حرثني لبث بثـّني هثـّني لين مرثني*** رفثني ورثني كما صاعقة جا معارض دعسني *** سعاني هوى العازبة لين حرضني*** مغضني نهضني ركض لظـّني هظـّني لين قرضني عطب عضني فضني لين قبضني*** نغضني دحضني تحت الثرى و الدواحس دحسني *** سعاني هوى العازبة لين قتلني*** شغلني ذبلني تلوّى لوى زاد عنـّي ختلني تحورج حرج بالتحارج وصلني*** مكنـّي مغنـّي قطع سديد المفاصل غرسني *** سعاني هوى العازبة جا محرّج*** تفرّج تبرّج تحورج حرج جايني بالتضجج الشعر من ولد موسى مخرّج*** باللي تبرّج يا معترض عنـّه قدّاش تسني الشاعر الشعبي العربي النجار أصيل قرية العالية. من الأغراض المهمة اللي امتاز بيه العربي النجار، غرض الأحرش. و الاحرش في الشعر الشعبي هي بمثابة إعلان الحرب و المواجهة بين زوز شعراء و الا أكثر، و فيها مراحل تبدى من المناوشات و شريان الشبوك و توفى برباط العرس و حلان الرباط. و كل الضربات مسموح بيها يا ما موش في منطق الشلايك متاع هالوقت. صحيح فيها سب و تهديد و وعيد ياما يلتزم بقواعد الشعر الشعبي اللي تقول "الغناء بالضد اللي سمعت رد" يحب يقول الرد متاع الشاعر يلزم يكون في نفس القافية و الميزان و الغرض اللي اتحدّاه بيها شاعر آخر. و كيف يعجز المُتحدَّى وما ينجمش يجاوب يعطي الماينة. ياما كيف يقوم يسب و يقشتل و يقول في كلام مرزي، الآمين متاع الغنايا يمنع عليه دخول الأعراس و كل من عنده فرح ما ينجمش يناديله. اخترتلكم قصيد في ميزان المسدس للعربي النجار و الفاهم يفهم المعاني أنا الذي شيخ أنا الذي شيخ في القول راوي***غرست النشاوي أنا الذي نقمة للي بلاوي *** أنا الذي شيخ في القول شايع***مالي ردايع أنا الذي نقمة لاهل الخدايع نهار الذي تنتقل التلايع***نهار النطايع نبارزك بالزناد و الجناوي *** أنا الذي شيخ في القول طايل***و مالي مثايل وانا الذي نقمة أهل الرذايل نركب على كوت مدُّب هايل***نخلـّف قتايل و متن الوطا نخلـّفه بدم راوي *** أنا الذي في القول شيخ راني***مفرد زماني أنا الذي نقمة للي هجاني نسقيه عصر الحدج بالحفاني***لانه بداني نخلـّيه في الهم يقعد يعاني *** أنا الذي شيخ في القول باذخ***قريت التوارخ انا الذي نقمة اللي منافخ من الدم وجهك نخلـّيه فاسخ***و الدمع ناخخ من لحظتك يهطل شبوب قاوي *** أنا الذي شيخ في القول توا***ألفاضي حلوة أنا الذي نقمةْ اللي تقوى يا قيف يا جطري ماك بوّه***كما بوم عوّى يبعوق على برج معدوم خاوي *** أنا الذي شيخ في القول ماهر***مشهور ظاهر انا الذي نقمةْ اللي عواهر توة نجمهر عليك الجماهر***نضحـّك الساهر عليك يا قيف يا بو النداوي *** عليك يا قيف يا سي سلكة***وجه البركـَّة و من حوزك العرس توَّ نفكه و نحاسبك بمبردي أنا نحكَّه***نخلـّيك دكة في جون ما ليك مصباح ضاوي *** قي جون ما ليك مصباح يضوي***و لا طبل يدوي جاهل من العلم دقلاف بدوي لا فقه لديانتك لاك نحوي***لا شي تروي من العلم حتى يسير الفداوي *** جاهل بغل رمز ماليك صاية***عديم الدراية أنا الذي صاحب العلم راية العربي النجار ناقل زغاية***لصربة أعداي من نضربه ندعسه في الكلاوي *** من نضربه ندعسه ما يعتـّق***ضلوعه نفـتّـق نكويه حتى عيوبه تنتـّق و دويلته فيه زادة نشتـّق***و تحت المرتّق نرميه في بير يهبط يناوي *** نرميه في بير ضيـّق و غارق***مسكن بطارق م الجان يسقوه من سم خارق نكووه بالسيميا و المحارق***حتى يفارق روحه بتعذيب مارد سماوي. |
مشكورة عزيزتي ويعطيك العافية
|
مجهود رائع وموضوع قيّم استمتعت بتواجدي بصفحتك بانتظار المزيد من هذا العطاء لك مني ارقّ تحية وأعذبها دمت بخير |
مجهود رائع وموضوع قيّم استمتعت بتواجدي بصفحتك بانتظار المزيد من هذا العطاء لك مني ارقّ تحية وأعذبها دمت بخير |
مجهود رائع وموضوع قيّم استمتعت بتواجدي بصفحتك بانتظار المزيد من هذا العطاء لك مني ارقّ تحية وأعذبها دمت بخير |
مجهود رائع وموضوع قيّم استمتعت بتواجدي بصفحتك بانتظار المزيد من هذا العطاء لك مني ارقّ تحية وأعذبها |
الاخت الغاليه ارب هديه رائعه لكل عربي تونسي ولكل من لايعرف ان تونس انجبت من الشعراء من هم بمرتبة امراء الشعر العربي سلمت اختي الغاليه اين الاخوة التونسيون ليقولوا شكر لشعرائهم قبل ان يتوجوها بشكر لغاليتنا ارب |
| الساعة الآن 02:37 PM. |
Powered by vBulletin® Copyright ©2000 - 2024, Jelsoft Enterprises Ltd. منتديات المُنى والأرب
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |