[محمد ماهر مرعي]

- رقصة واحدة


.

مدي ايدك ,,
واسندي بكفك على كتفي اللي بيحن لمداعبه ,
ولَي وجهك شطر عيني ,
وحضّري روحي اللي تاهت في سنيني ,
واغزلي بضحكة شفايفك عمر تاني..
أعيشه في اللحظه الحاليه
أنا ليكِ , كوني ليّا .

قربي لو خطوة واحدة ,,
تجعل المسافات سراب
واهمسي لو كلمة واحده ,,
أترمي في حضن السحاب
اتجنني لو يوم أجن ,
طاوعي قلبك لو يحن
واسكري بكل الحروف المتعبه
قلبي رغم الشوق يا عمري
واقف وقفه مؤدبه

سافري فيا ,,
قطعي تذاكر إيابك
ضمدي العمر اللي مشروخ ,,
من غيابك
جمّعي الدم اللي مسفوح ..
فوق ترابك
ارقصي ,, ولو الموسيقى مُبهمه
رقصتك تظبط ايقاع القلب لو حس بنشاذ
ضحكتك تظبط ايقاع الملحمه

محمد ماهر
5/7/2017