[شوقى غنيم]

تاريخ ميلادى 1/7/1938 ومر 83 سنه بسرعه
والله أعلم باقى من عمرى قد ايه والله أعلم ييجى عيد ميلاى مره تانيه وأنا موجود واللا لأ والأعمار قدرها الله ونسأل الله حسن الخاتمه لدرجة قلت أنشر عيد ميلادى قبل ما ييجى موش ضامن أعيش ليوم أول يوليو
وحبيت اكتب فى عيد ميلادى السنادى بطريقه مختلفه
************************
النهارده عيد ميلادى
للشاعر المصرى شوقى غنيم
********
النهارده أول يوليو عيد ميلادى
امبارح تلاتين يونيو ثورة مصر بلادى
والكل مشاركنى أعيادى
ومن الصبحيه جه أولادى جوم أحفادى
بيشاركونى عيد ميلادى السنادى
ولولا الكورونا لأخدتهم بالأحضان
نهله بنتى نها حبيبتى وبنتى ايمان
ابنى محمد احمد ابراهيم محمود وعبد الرحمن
والمرحومه منى بنتى فى جنة الرضوان
يبارك فيهم ربى ويذيدهم بالايمان
*********
ومن ميت غمر جوم كل اخواتى أخويا محمد وابراهيم
وولاد عمومتى مالين حياتى وولاد ابن عمى عبدا الحليم
الله يرحمه أخو المرحومه مراتى لاتنين فى جنة النعيم
موش دول بس اللى فى حياتى كل من كان في اسمه غنيم
وعلى الفيس بوك كل صحابى ولاد بنات رجال حريم
والست التانيه مراتى ام محمود أ م ابراهيم
ست مراعيه كل مصالحى ومعايا فى عمرى الثلاثه وتمانين
تشاركنى فى فرحى وف أحزانى وهى فى عمر تسعه وأربعين
*****************
وأنا فى عمرى سنى كبير بسرعه عدا وفات
وشعرى لاسود ابيض قصير ووجهى عليه تجاعيد السنوات
ورجلى موش قادره ع المشى كتير بس الوجه منور بالبركات
والعمر لازم يكون فيه تغيير وايدىّ بتقل فى الحركات
بس لدلوقتى لسه فى عملى مدير..عملى كله فى الحسابات
وبقول لأحبابى وكل صحابى اعمل بضمير يرضى عليك رب السموات
****************************
مولود فى بلدى كفر بهيده مركزميت غمر
اللى بديت فيها أيامى السعيده فى بداية العمر
وفى الابتدائيه اتعلمت ان وأخواتها وحروف الجر
والصلا كنا نصلى فى مدرستنا صلاة الظهر
ولو مستمرين فى دراستنا نصلى كمان العصر
وكان الدين علم أساسى وحفظ القرآن يحسن الفكر
ومن أولى ثانوى ابتدت عندى موهبة كتابة الشعر
ومن مدرسة ميت غمر الثانويه اتخرجت
وكان العام دا عام سته وخمسين
ومن حبى لبلدى فى الكليه البحريه قدمت
بس فى السنادى حصل العدوان الثلاثى اللعين
مع الحرس الوطنى للدفاع عن بلدى اشتركت
وكنت واحد من الجنود الفدائيين
وعن كل شبر فى بلدى قاومت
لحد ما خرج من بلادنا لانجليز المحتلين
وفى العرض العسكرى ثلاث سنوات اشتركت
من عام أربعه وخمسين لسته وخمسين
وفى تسعه وخمسين فى الجيش اتجندت
وخرجت فى نوفمبر من عام ستين
وفى الاحتياط من عام ستين فى الخدمه اشتركت
وآخرها كان عام سبعه وستين
وفى بلدى التانيه زهراء أنشاص
بقضى بقيت عمرى
قابلت فيها أحسن ناس
أكن ليهم كل حبى
حبتهم وحبونى باخلاص
وحبى ليهم من قلبى
كل واحد منهم على الراس
من قلبى تقديرى وشكرى
فى قلبى ليهم أجمل احساس
لحد ما يوصلونى الى قبرى
*************