[محمد ماهر مرعي]

لو تميل المايه يمك
تبقي نيلي ابقي يمك
اشملي العالم/ العاشق بكرمك
و اكرميني بضمه تانيه

قلبي المزروع بخيرك
كفك الممدود دا خيرك
قلبي يشرب زي طيرك
اوهبيلي شربه تانيه

تكسي مني اللحم الاخضر
تروق الدم المعكر
تشفي مني كل ألمي ..
لو سمحتي نقطه تانيه

تروي مني جفاف ف روحي
تسقي فيا انهار طموحي
يا للي عينك ليا ساقيه
تسمحي لو لفه تانيه !

تسمحي لو امد ايدي
تزحمي رسايل بريدي
تكسري فيا جليدي
لو تضمي ضمه تانيه

ضمه تانيه تضم كُلّي
م اللي راح و اللي فاضلي
جمّعي مني اللي تايه
تستقم روحي ف " تَنيَّه " !


#‏محمد_ماهر !
13 أغسطس‏2016