[محمد ماهر مرعي]

اصحى يا بنى وفوق الحكايه مش تحدى
ولا مين بيخطف ..
ولا مين بيقطف ..
ولا مين ماشي .. ولا مين بيجرى ؟؟
ولا مين يكّشر
ولا مين يخسّر
ولا مين بياخد ولا مين بيدى !!
وان كان ع الكلام ..
الكلام ياما ..
وفى كل حته ..
ليّا يجى ميت ديوان ..
مره زمان ..
فرفور قابلنى .. وقالى سؤال ..
هى الحكايه بتبتدى من الألف ؟!
طب لو مش عارف ابتدى .. أعمل ايه ؟
وهو العَلام عن قلته بيختلف ؟
قولى انت الأصل ايه ..؟؟
قولتله لأ ..
الحكايه بتبتدى من جواك انت ..
من وقت ما تمسك قلم ..
من وقت ما ترفع علم ..
من وقت ما يدق قلبك بين ضلوعك
من وقت ما تنسى خضوعك
وتكتشف انك نِمرْ !!
مش جبان ..
وعايش حياتك كده ..
مره جحش
ومره تِـــحش
ومره طور من التيران ..
وبتختلف ...
انك بشر
ولا بقر
ولا حياتك مُتعبه
ما الشمس وهى لسه مع الآدان ..
غير وهى مِغَرَّبَهْ !!!
بتختلف ..
انا عايزك أســــــد
مرفوعه راسك وسط البلد
مش تخاااااف
الخوف خلاص راح زمانه
متبقاش عامل زى اللى بيغرق ..
وبيسأل مين اللى خانه !!
اطلع الأول ودوس على أرض صلبه !!
وخلى قلمك .. وخلى علمك ..
هو سلاحـــك !!
هو سر نجاحـــك !!
امسكه .. وتَبِّتْ فيه جامد ..
زى نبــوت أوعصايه ..
مش مياصه ..
وكلاب حراسه ..
وساعة الجد .. بتهزر !!
اصل الحكايه مش ان فى ايدك مسدس ولا مصاصه
الحكايه انك .. تقـــدّر
الحكايه انك تفـــــــكر
الحكايه بإنك تعرف .. من قد ايه واقف مكانك
ومين جرحك ومين دبحك ومين حرق بيتك وغيطك ..
ومين كسر زهوة شبابك .. ومين صانك ؟؟
ومين علق حرس الخوف .. فوق عِتابك !
وبعدهــا .. تدوّر مين اللى خانك!!
عرفت مين اللى خانـــك ؟؟!!
اللى خانك .. هو انت !!!
الحكايه مش اختلاف أو ائتلاف ..
او ايه الفرق بين الكولا وبيبسي
أو هو ايه الفرق من عرق الذكوره .. والوسكى
الحاكيه تكون راجل ..
ما هو لما تيجى تعرف الأصل وجماله ..
متدورش فى الكيماوى والتئاوى ..
وفى الفياجرا والمناضله ..
وفى مجلس الأمن ..
اللى ودنه من اسرائيــل وودن من عجين ..
من كام يوم قالولى دول بيضربوا ليبيا ..
وهيحرروها من القذافــــــــــــى !!!!!!!!!!!
قولته يا ساعه مهببه .. الأجانب هيحرروا ابن البلد من ابنها ..
هيحرروا الأرض من طينها ورملها ..
أما راجــــــل غبــى ,, وعامل نفسه مناضــل ..
ما يسيبها ويمشي .. مش يفضل لحد ما يدخلها أجنبى سافل
امريكانى بريطانى ولا كندا ..
خللى اللى يجى يبقى منكم .. متبقاش جاهل ..
نسيت أنا الأصل ايه ..
الأصل فى أصلك .. والأصل في الطين ...
مش أقف أصقفلك .. لحد ما تلين ..
واقف أرقصلك لحد ما تتطاطى !!!
وانت خروف مهفوف .. البعيد واطــى !!
اعرف يا ابنى ..
فين الطريق وامشيه ..
قبل ما تشيل الطين فوق دماغك دور عليه
صدقنــــــى هتلاقيه !!
ولما تلاقيه افتكر ..
ان الحكايه مش مُعضِله ..
أو مشكله ..
أو مين يحل المسئله ؟
الحكايه مش كلام ,,
آخر كلام .. قبل السلام ,,
الحكايه .. احتـــــــــــــرام !!
*
*
*
*
قلم .. ميتو عاشق الفن
26 مارس 2011