[وفاء بنت غزة]

ردا على وصية ستي
كبرت حالك ومالك يا ستي
كديش بتحكي وبتوصي
احنا عشاك الوطن يا ستي
امي لما حملتني توحمت على كمشة تراب من ارض الوطن
وجابوها يا ستي….. واطعموني تراب الوطن ……وصبغوني ببطن امي
الشكراء……وصرت من لون تراب الارض… والله ستر كان بوروني يا ستي
ولما فرجها الله يا ستي من زود العز انولدت في خيمة وكدموا
للمهنين حلكوم وبيض حمام وكالو لما ربنا يفرجها رح نعمل لعروسنا مخدة ريش نعام ونذبح ذبيحه بعد ما ترجع البلاد ونرفع علمنا عالي
ومرت الايام لا شفت ذبيحة ولا ريش نعام…..اعطوني كرت الوكاله لدافش على
صحن البرغل والفاصوليا وكل يوم الكرت بيخزكوا على عدد ايام الشهر…حتى ما
ارجع اكل مرة تانيه في نفس اليوم….وبعد محاولات فاشلة في الصف على الدور
مرة تانيه لأحصل على حبة تفاح تانيه لأمي وحتى اصل للكمة السعادة واسد جوعي
بتكون روحي طلعت وانا في الطابور…. بس الحكيكه انو اكلهم زاكي ولساتها
طعمتو في تمي………….اكيد لان الي طبخوا ابو زكي فلسطيني معدل
ذل ومهانه يا ستي عشناها وبنعيشها كل يوم بعيد عن مكثاة جدي وخير ارضنا وبيارات جدودنا
كيف ننسى يا ستي وحفيدي بغني
جفرا وهي يا الربع
وانا لسه بعشك كل همسه للوطن وبدور على اخباروا من محطه لمحطه؟؟؟؟؟؟؟؟؟
كيف يا ستي
انت موتي وارتاحي …ويمكن امي وانا على طريقك………بس اكيد رح نوصي المفاعيص ورانا وما رح يضيعوها لا تخافي مش انت كطعت سرهم
توكلي على الله ياستي وسلمي على سيدي وكذبي عليه وكوليلو الارض رجعت خلي يبطل يزورني في الحلم بدي انام يا ستي
من خربشاتي
وفاء