أكيد بِعادِك أحسنْ . وإلا كُنت أرجع .. محمد ماهر مرعي

[محمد ماهر مرعي]

إيه يعني لما أموت ..
هو الموت بقى بُعبُع
ما ناس كتير بتموت ..
ولا حد قادر يرجع
أكيد هناك أحسن ..
وإلا كان يرجع ..

ما أنا لو رحت مكان ..
وسِبْت أنا أرضى
لو فيه هعيش فرحان ..
بقيت سنيني هَقَّضِي
لو فيه هعيش حزنان ..
هرجع هنا مَرْضِي
طب ليه أنا أرجع
مادام هناك أحسن ..
وإلا هبقى أرجع!!!


وأنا أخاف من إيه
لا عُمري آذيت جار
ولا عُمري خُنت عهد ..
ولا فكرت آخد بتار
ولا أكْسَر نِفس حد
حتى أما حبيتك ..
حبيتك بجد
عمري ما كرهتك ...
رغم انك اللى ابتديتي البعد
طب ليه أنا أرجع
لقيت بعادك أحسن ...
وإلا كنت أرجع !


أنا معاليش حاجه لغيري
وأنا راضى بمصيري
ولا طمعان في حاجه
حتى قلبي اللى خدتيه مليان
ورجعتيه مفيهوش أي حاجه
سامحتك فيه
محسبتكيش عليه ...
ولا خدت قصاده حاجه
وهبتهولك كله ...
مفيش هِبه بترجع ...
فكنت أنا الأحسن
وإلا كنت أرجع


فلما أقولك أموت
متفكريش خايف
لازم هقابل موت
عايز أقابله واقف
مش كسراني حاجه
ولاحد له عندي حاجه
والكون بخبري يسمع
ويقولوا كان أحسن ..
يا ريته لو يرجع !


قلمى

محمد ماهر مرعي

18 / 3 / 2012



::r::