منتديات المُنى والأرب - شهر يوليو عيد ميلادى

اول يوليو والشهركله عيد ميلادى
للشاعر المصرى شوقى غنيم
********
أول يوليو والشهر كله عيد ميلادى
وقبلها تلاتين يونيو ثورة مصر بلادى
والكل مشاركنى أعيادى
ومن الصبحيه جه أولادى جوم أحفادى
بيشاركونى عيد ميلادى السنادى
ولولا الكورونا لأخدتهم بالأحضان
نهله بنتى نها حبيبتى وبنتى ايمان
ابنى محمد احمد ابراهيم محمود وعبد الرحمن
والمرحومه منى بنتى فى جنة الرضوان
يبارك فيهم ربى ويذيدهم بالايمان
*********
ومن ميت غمر جوم كل اخواتى أخويا محمد وابراهيم
وولاد عمومتى مالين حياتى وولاد ابن عمى عبدا الحليم
الله يرحمه أخو المرحومه مراتى لاتنين فى جنة النعيم
موش دول بس اللى فى حياتى كل من كان في اسمه غنيم
وعلى الفيس بوك كل صحابى ولاد بنات رجال حريم
والست التانيه مراتى ام محمود أ م ابراهيم
ست مراعيه كل مصالحى ومعايا فى عمرى التنين وتمانين
تشاركنى فى فرحى وف أحزانى وهى فى عمر تمانيه وأربعين
*****************
وأنا فى عمرى سنى كبير بسرعه عدا وفات
وشعرى لاسود ابيض قصيرووجهى عليه تجاعيد السنوات
ورجلى موش قادره ع المشى كتير بس الوجه منور بالبركات
والعمر لازم يكون فيه تغيير وايدىّ بتقل فى الحركات
بس لدلوقتى لسه فى عملى مدير..عملى كله فى الحسابات
وبقول لأحبابى وكل صحابى اعمل بضمير يرضى عليك رب السموات
*******
لو ما جاش اليوم دا تانى ابقو افتكرونى
عارف ده موش حيفوتكم عشان بتحبونى
واطلبوا من ربى الرحمه وانتو ا بتدفنونى
واتزوروا قبرى بزيارتكم لى ّ بترحمونى
دانا فى قبرى بشوفكم وانتم كمان بتشوفونى
******************
اتفكروا أخ وصاحب وصديق الفيس
ما تتفكروش انى كنت للبعض رئيس
افتكروا بس انى حببكم وليكوا ونيس
ملا فى حبكم أشعار فى كتب وكراريس
وفى يده كتاب الله وعمره ما طاوع ابليس
***************
وبوصى ولادى كونوا لبعض أحباب
افتكرونى دايما جنبكم موش أب وغاب
دا عمر لاتنين وتمانين ببقى عند الله شباب
واطلبولى من الله الرحمه من الله ليكم صواب
والحسنه بعشر أمثالها واللى يدعى لأبوه ما خاب
***************
ياولادى ان كنت قصرت فى حاجه سماح
واقرولى الفاتحه فى كل مسا و كل صباح
بينكم دلوقتى بتحمل ودارى عنكم أى جراح
واحبس آلامى بين ضلوعى وقلبى كله انشراح
ودارى الحزن وباقى عمرى أشاركم الأفراح
****************

https://scontent-amt2-1.xx.fbcdn.net...b0&oe=5F3912A5

١٥