منتديات المُنى والأرب - من الأكلات اللليبية

حبيت اليوم قدملكن أكلة من الأكلا الليبية المشهورة .. وهي إسمها (رشده)

الاكل الليبي أو أكل المغرب العربي بشكل عام بيتميز باللون الأحمر لدبس البندورة اللي بيعتمدو عليه كتير بأكلاتن..
وطبعا الطعمة الحارة ونكهة البهارات وأهمها الكركم ..

http://www.up.qatarw.com/up/2010-10-...1694837049.jpg

هاي الأكلة عبارة عن
عجينة بتتجهز بالبيت او بتنشرى جاهزة من السوق وهي عبارة عن نوع معين من عجينة المعكرونة الناعمة كتير والطرية ...

طريقة طبخها بواسطة البخار الناتج عن صلصة اللحمة والخضار..

لطبخ هاي الأكلة منحتاج لطنجرة بخار ..

المكونات..

لحمة بقر أو خاروف أو جاج على حسب الرغبة ..

دبس بندورة ..

بهارات مطحونة(فلفل اسود .. قرفة.. فليفلة حمرا .. كركم .. )

زيت .. حمص.. ماء

بطاطا قطع كبيرة.. يقطين قطع كبيرة.. بصل مقطع جوانح ..

فليفلة خضرا...

طريقة الطبخة ...

اول شي منبدا بوضع الزيت بالطنجرة ليحمى شوي ومنضيف عليه اللحمة ..
بتتقلب على نار هادية .. ومن بعدا منضيف البهارات .. ومنقلبها لتمتص اللحمة البهارات ..

يضاف دبس البندورة على اللحم والبهارات ومنقلب شوي كمان .. ومن بعدا منضيف الحمص ..
وآخر شي كمية مناسبة من الماء...

بهالوقت منجهز العجينة بإضافة شوية قرفة وزيت وفركها شوي لوضعا في الطنجرة المخصصة للطبخ بالبخار وهي بتكون طنجرة مثقبة بحيت يدخل البخار من خلالها ليسوي الرشدة..
بعد وضع الرشده (هاد اسم العجينة ) داخل الطنجرة المخصصة الها منحطها فوق طنجرة اللحمة ومنغطيها ..

بهالأثناء منجهز البطاطا واليقطين بتقطيعن لقطع كبيرة ..
ومنفرم بصل جوانح وبتكون كمية البصل كبيرة ... الطعمة كتير اطيب بكترة البصل ..

بعد مرور حوالي نصف ساعة على الطبخ ...
منفضي الرشدة بوعاء واسع وغميق ومنسقيها من مرقة اللحمة شوي مو كتير بس لتتشبع منها شوي .. ومنرجعها على الطنجرة مرة تاني ومنتركها بلا غطا .. لبين ما تستوا اللحمة ..

بمجرد ما تستوي اللحمة ... منضيف الخضرة اللي جهزناها لبين ما تستوا ..
منعدل الملح .. وبهاوقت بيكون صار عنا يخنة سميكة شوي ...

وقت السكب بتسكب بجاط مخصص للأكلات الليبية (قصعة)... لأن بيكسبها حماوة طوال فترة الأكل..

منسكب الرشدة ومنبدا بتسقايتها بمرقة اللحمة والخضرة ..
ومن بعدا منفرد على وجها البصل والحمص.. وفوقهن الخضرة ..واللحمة ..

بتتزين بالبطاطا المقلية والفيفلة الخضرا المقلية ..
وآخر خطوة بتعطيها نكهة غير شكل .. رشة قرفة..

وصحتين و100 هنا