[فتحي عيسي]

عالم غريب عجيب كل حاجه فيه ممكنه
فى المكسب تلاقيه وف الخساره
معندوش أى مشكله
يعلمك أيوه إلى ما لا نهايه
يفيدك أيوه فوق الفايدة وفوق كل شطارة
يضيعك أيوة ويبيعك أجدعها عمارة
يعرفك أيوة مداخل كل حارة
يتوهك أيوة ويسيبك تخلص أدامه زى سيجارة
عالم ساحر بمعنى الكلمة كنز من كنوز الدنيا الحديثة
في ناس بتعرفله أووى لإنها هى اللى عملتة صنعتة بإيديها
بتعرف توصل بيه لأبعد من خيالك
بتحرك الكون بيه وبتوصل لأدق تفصيلة بعينيه
ناس بتفكر بيه وليه بتستخدمه فى صنوف حياتها
وفى كل لحظة بتضيف عليه وف كل يوم بتغذية
مش زينا بنلعب بيه
بنتسلى مع الوانه وبندور علينا فيه
سكتنا ليه معروفة كام شارع من بلاويه
معظمنا داخل لمزاجه من كبت فرقعله عينيه
فاتح شاتة على ذاتة مستنى اللى يعديه
معندوش مانع لو طلع اللى بيكلمه صايع وباع هدومه عليه
المهم يسليه
ومين شايف بعينيه كلام طالع من جحر لجحر ياعالم بيه
ولا المتنديات عالم الملكات والنحل الداير فيه
على كل لون يا باطيسطة هتلاقوا فيه
الشايع والمايع والوالع والضايع والجايع واللى هربان من
كل مكان كان فيه
بالاسم الخالى من المعنى والخارج عن حدود اراضيه
متخفى وراه وداخل يفرش حصيره عليه
عجبه الحال ارتاح ومدد رجليه معجبوش فاته وراح يلاقيه
وفيه عالم تانية أنضف مالصينى بعد غسيله
داخلين والنية الحلوة سابقة خطوتهم والطيبة جابينها معاهم
من بيتهم ميتهم بيضا مش متعكرة
دول بقى ياخوفى عليهم
عالم المنتديات
عالم مفتوح ممكن يكون بوابة عمرك
لمستقبل رائع بينمى فيك موهبتك
بيديها الامل بيعرفك قدراتك
استعدادك أدواتك
أستقبال الناس لمجهودك إيه
وممكن يهدك لو مشيت ورا
إيه ولا إيه ولا إية
ربنا يدينا خيره
ويكفينا شر بلاوية
فتحى عيسى