رسالة الى ستي فريدة الف رحمة ونور تنزل عليها

[وفاء بنت غزة]

يسعد
مساك والف رحمه ونور تنزل على كبرك يا ستي يا طاهرة
وياعفيفة النفس....يا مدرسة احتارت كل المناهج تهذب
نفوس مثل ما هذبت ويا تربية قويمة ربت وخرجت اجيال بدون
دفتر وكلم ............انا ؟؟؟؟..... انا تعبانه كتير يا ستي صارت
حياتنا ما بتنطاك ولا حتى الها طعم ولون قررت
افضفضلك لانو ما حدا بفهم علي وبيحفظ سري غيرك بعرفك
مستعجلة تسمعي اخبار الجميع وبدكيش مكدمات طويله ولا حكي منمق بدك
الصافي حاضر
يا ستي الحمد
لله كلنا بخير بنوكل ونااااااااااااام ونشرب بيحكو في فقر بس الحاويات البسس منها شبعانه
فش مخافة الله عند النسوان يا ستي
عايشين من كلة الموت يمكن هو ابتلاء للمسلمين والمسلمات .................امبارح
اجتمعنا!!!!!!!!!! كلنا تخافيش فش اشي بس كطعت الكهرباء واطلعنا
من جحورنا مثل الفيران............. اه يا
ستي ما احنا ما بنجتمع الا لما تقطع الكهرباء لانو
كل واحد فينا ايلو عالموا الخاص يعني الي
كاعد بتابع اخبار الجزيرة في غرفة
والي بحضر عرب اديو ووعرب قتلند
وايلي المباريات واكلات مخو والي
مشغول على النت ؟؟؟؟؟؟؟؟؟شو النت
اشي ما بتعرفية الناس
صارت تحكي مع بعض بدون ما يطلعوا من الدور
بتكون الوحده كشتها بدها اربع ماشطات
وداراها عايمة وبتحكي كلام من ذهب ما شاء الله عنها وكلها حكم وكأنها برنسيسة
وعندها اربع خدامات
وهو كمان مش مكصر بيكون عامل حالو ابو زيد الهلالي
في الشجاعة والوطنية والكلام الروومانسي وهو في دار بلاش احكي خليني ساكته يا ستي والي
على البلاستيشن هاي لعبة اي شو بدي اشرحلك ما رح تفهميني علي..............والي
على على التلفون واااااخ من التفلون الي من الاخر والي ....والي والي عالم
فضيع يا ستي المهم سامحيني امبارح
طلعت سخان المي الكديم تاعك كنت مخبيتو لعوزة وذكرى منك لاسخن مي فيه ما الكيزر
صبح وجهو مسكع من كلة الكهرباء وشمتان
فيه وحاط عنها ومستريح والثلاجة
معتمة مثل خزانتك تاعة المونه الي
بتحطي فيها كل اشي زاكي بس بتعرفي عجبتني كطعة الكهرباء كثيرما انتي
عارفة انا ما بحبش نومة الصبح كان
صوت العصافير طالع والهواء بيلعب بالشجر لعب
والجاجات متل عادتهم هن والديك بس الجاجة تحط البيضة
بتفزع الحارة حتى ما حدا يقول عنها ما باضت والهدوء
بعم المكان الا صوت جارنا ابو عدنان مهو
مسخم جوز النسوان بدو يرضى مين ولا مين كانت
الطبيعة بتحكي.................. المطر
والشتاء؟؟؟؟؟؟؟؟؟؟؟؟ تخافيش
علينا بطلت الاربعينة زي زمان الحمدلله
دفا وعفا بنعرفش هو رضى ولا غضب بس فش
حدا بفكر باهلشغلة المهم انا اعيش وغيري يوكل تراب بس مش كلهم هيذا ما هيتا ان خليت بليت يعني
لوما رحمة ربنا بالدواب كان ما اجانا مطر ولا حتى ضوا علينا كمر......(قمر)بعرف
يا ستي لساني طويل بس اعذريني كلبي مليان. بنتك حفيظة؟؟؟؟؟؟؟؟؟؟؟؟؟؟ بنتك
حفيظة لساتها عايشه هههههههههه ما
اهبلني ما انتي بتعرفي كال
عايشة كال!!!!!!...... المصيبة انها بطلت تحضر اخبار لانو
بنات ابنك علمنها تحضر مسلسلات تركية بالعربي اما
شو انكلبت طاكية راسها وبلشت تخلص للدولة العثمانية والاتراك من يوم اسطول الحرية على غزة وهي
بتحضرش الا مسلسلات تركية واكتشفت
انو الخمرا عنا المسلمين بشربوها عادي وانو الزنا حب من الاخر ويم هيذااااااا عادي وبتتعاطف مع الحبيبين ليتجوزو وبتنتظر المسلسل على نار واحترت
اكنعها انو هذا مش دينا ولا اعرافنا وفش
فايدة والتلفزيون
بطل مثل زمان صار شغال ليل نهار والكل بتفلسف وبيحكي
على كيفوا وصارو يحيرونا معهم
يوم في اعتصام ويوم في مسيرات ويوم بدنا نعدل الحال المايل
والي بيوصل يا ستي بنسانا
لا بنسى امو وابو والي خلفووووووووه
والله حال امتنا ببكي يا ستي اشي
بيكول باعوها وايشي بكول لا وبعدها فلسطين على الحدود واقفة
هي لابسه وجاهزة بس بتستنى النكوط ورجال يطلعوها
بتعرفش انو لسه فرحها كل يوم بتأجل ايام وانو حبايبها صار في اشياءءءءءءءءء بتشغلهم وولاد عمها بذبحبوا بعض على مين بدا يكود جملها
بنشوف في شوارعنا ربيع عربي بس والله ما شفنا لحدا هسه الا الحنون الاحمر النقي
دم الشهدا والاطفال والنساء صورة مشوشة حزينة كرهتنا في الاخبار عم بنغمس
لقمتنا بدمهم كل يوم وبنوكل عادي وبنضحك وبنعيش وبنحكي عن الحب والثورة
وبننتظر الامل والامل حاط راسو وناااااااااااااااااااااايم
الخضار العربي؟؟؟؟
الخضااااااارالعربي يا ستي
لسا ما ورق ويمكن ما يورق من سوء النوايا المهم
يا ستي انو عمالهم يحكو عنو ربيع عربي ولا خراب عربي ما حدا
عارف حال
امتنا العربية بتلعب فيه ايدي خفيه والله اعلم يا ستي معلش
يا ستي خبي الرساله بس هاي عن سيدي لاني
بعرفو ا ما بحبش الروح الانهزامية انا
ما انهزمت بس حاسة طاسة راسي دايرة وين ترسي بعرفش
تعبت يا ستي من الكتابة وراسي وقلبي شاب
رح بكتبلك رسالة عن اخباري واخبار عماتي وحتى عن الزعماء العرب
ولا يهمك فش غيرك بكتبلو وفش غيرك تربع على عرش الذاكره
سلمي واستري على ما كتبتلك وتزعليش ياستي
ملاحظة
ستي فريده هي رمز لكل معنى وطني حر
وعادات عربية اصيلة
وأمرأة عربية حره ربت اجيال
وما بيوم هانت ولا باعت
وهن كثر
وفاء شتاء 2012