ماذا تكتب على جدار الزمن لو اعطوك طبشورة؟؟؟ خربش براحتك

وفاء بنت غزة · 11 - 6 - 2012, 08:20 PM

ساكتب عل جدار الزمن بداية بسم الله الرحمن الرحيم لانو تعودنا نبدأ فيها كلامنا
ويمكن لانو هي بتطلع معي حلوة في خطي اللي مثل خربيش الجاج
ورح اكتب بلغتنا العربية لانها مصدر حضارتنا ومنبعها قرآنا الكريم
مشان الغي ما يسمى بالعربيزي
ورح استعمل الفاصلة مو لشي لحتى نوخذ نفس ونفكر قبل ما نحكي
وكمان رح اخذ النقطة مشان توقف كل ظالم ومستبد عند حدو
كمان لا تواخذوني رح اكتب بخط مايل خروجا عن المألوف مطول عمرنا عدلين شو صار يعني لما نخربش بالمايل
ويسامحوني معلمي الرياضيات لاني رح استخدم من عندهم اشارة الطرح لحتي اطرح من حياتنا كل ما هو غريب عنها وعن مجتمعاتنا وعاداتنا
ورح استعمل اشارة الجمع يمكن تتوحد كلمة امتنا ونصير مثل الناس والخلق
وبعد الطرح والجمع يحلو لي استخدام اشارة القسمة حتى فيها نعرف نتقاسم الكلمة الحلوة ولقمة العيش والمي والنفط يالله خلي الكل يعيش
ومن الالوان رح اكتب باللون الابيض اللي بعبر عن رقي فكر المتواجدين ورح اكتب باللون الاخضر لحتى اذكر ربيع الارض وخيرها وانو مهما صار ربنا حليم وغفار ورح ينزل علينا الامطار
ورح اكتب كمان باللون الاحمر وبخط عريض
لا تزعلي يا ام الشهيد وين ما كنت تكوني هذاي الارض عروس بتتحنى من دم ولادها لحتى نعيش بعزة وكرامه
ورح اكتب باللون الاسود ههههههههه مو لشيء بس مشان الفخافة والرسميات ماهي فرصة يعني
ومن فكري وعقلي رح اطلع هالكلمتين واجري على الله
ما كنت اعرف بيوم اني عبر هالسلك وخيوط الشبكة العنكبوتيه رح احلق الى اماكن كثير وانا قاعدة على الحصيرة
والله شكلي سرحت بالكتابة ويمكن صور الصين ما بيكفي لكل اللي بخاطري
اقولكم
اخر عبارة رح اكتبها
انو مهما اشتدت على امتنا الاهوال ومهما طال الزمان
القدس ستبقى قدسنا والاقصى مسرى نبينا
محال نفرط في محال
خلصوا الطباشير كان كملت اعذروني
اختكم وفاء

**shreeata** · 11 - 6 - 2012, 09:45 PM

جميل ماقرأت لك هنا
خربشة رائعة بالوان ذلك العلم الخالي من كل شيئ الا الدم
ورائحة القدس وشوارعها
رائعة سيدتي لكن
هذه الكلمة استوقفتني كثيرا
بالعربيزي
لك طريقة رائعة بالتعبير
والسخرية
لما وصلنا اليه حتى
في لهجتنا ولغتنا
خرابيش اكثر من رائعة
تحيات لك