الرسالة الأخيرة الي الشهيد صدام حسين

[زمان البوح]

الرسالة الاخيرة الى الشهيد صدام حسين

الشاعر المصري : عبد الناصر حجازي – بور سعيد


ماعرفتش انك حر غير من دخلتك ع الموت بتهتف للوطن
واقف كما نخل العراق ..
تراقب الهزة الاخيرة للجريد،
تتأمل الحبل اللي جاي لك..
من ورا الاطلنطي يعمل للعروبة مشنقة
حاوط رقبتك ،
وبثبات .. واقف بتتفرج عليه ..
كأنه عقد،
كأنه باقة ورد من بستان (عرابي) او سبحة (المختار)
فضلت ابحث عن الرهبة ف عينيك .. مالقيتش
فضلت ابحث عن الرجفة ف ايديك .. مالقتيش
فضلت ابحث عن اللهفة لنجاتك ،
عن خرم بتحاول تسرب منه آخر نملة بتجرجر حياتك .. مالقيتش

هو انت ايه ؟
من آخر الاساطير بتحكي قصتك ؟
ولا انت شارب م الفرات دم التاريخ ؟
صدقني وانت بتشتهي النزع الاخير،
وبتفدي روحك بالبدن ..
لحظة شفايفك ما ابتدت تتوضى بحروف الشهادة ..
اتنفضت ..كأن سور الاقصى ميّل،
كأن مات لي ساعتها عيّل
من يوميها وشاشة التلفاز عليها شريطة سودة ..
وصوته اشبه بالعويل
ولسة ما قدرش التاريخ يعتر على الرمز البديل ..
اللي بايديه يجمع خيوط كل العشائر،
وف جبينه الكبرياء
ما انت اللي كان بيضخ قلبك دمه لعروق العراق
عجبني موتك ..
وانت بتشد الحياة .. م (المشنقة )
وتكتب بايد (الموت) شهادة (للميلاد)
ورحمة العزة اللي لسه دمها في القبر سُخن
انت اللي لحظتها (اتشنقت) واحنا اللي متنا.

احنا اللي بعناك (بالدولار)،
وسمحنا للقناص يصيدك من (سطوحنا)،
احنا اللي صلينا (لسوى الرب) ونحرناك ع الملا ،
ودمك اتعبّى ف خطوط النفط واتحول لتجار العبيد
وصبحت راس ديبنا اللي طارت
لجل تحنى رؤوس كتير
مع ان كل ديابنا باعت راسها واستكفت يادوب بالديول
في كل قصر تلاقي ديل،
فوق كل عرش تلاقي ديل،
ولكل ديل في بلادنا ديل ،
وبلادنا ليل ونهار في ليل..
من يوم ما خبينا القمر في الشق،
من يوم صفنا ما اتشق
وادينا لعدونا حبل يشنقنا
ومن يومها النعام نايم على عروشنا
واعلام العروبة بيتمسح بيها بلاط (فرعون)
ف نام في القبر واطمن على (روحك)
وسيب الميتين ماشيين باكفانهم
لحد الشمس ما تسيح عروشهم
وقتها ..
هيحسسوا رقابهم ويتفاجؤم بإن الحبل كان اطول من اللازم ،
وان المشنقة
متفصلة بحجم الوطن