[أم جهيد بنت مسعود]

صباح الخير يا غزة.
قهوة الصبح؟ بيحنن عليك الله. الغاز؟ بس يبعت الله. والقهوة مش من ضروريات الحياة. يعني مش حاجات انسانية.
صباح الخير يا غزة.
آلو تاكسي؟ ليش بتفكري حالك عايشة على المريخ؟! يا عم تاكسي! ليش هو أنت أحسن من اللي واقفين على الطريق؟!
طيب، صباح الخير يا غزة.
يلا بنوقف على الطريق. يا الله ما أحلى نكون من عامة الشعب. أصله الشعب كله على الطريق. والسيارات الفارهة فقط تمر، وتترك خلفها رائحة البنزين والسولار. يللا خلي الشعب يعيش. هو احنا لاقيينه! والمثل بيقول شم ولا تذوق.
صباح الخير يا غزة.
مناضل بيخبر مواطن: إسمع دير بالك ،الإيجار صار الضعف. بس الضعف. يعني حضر الفكة وما تعطي السواق أكتر من المطلوب. يعني لو بتفكر تعطيه أكثر إعرف ما راح يرجعلك باقي. بيقلك شكراً والله يسهلك.
صباح الخير يا غزة
ماشي، الفكة يا عالم مافيش أسهل منها. السوبر ماركت قريب. اسمع: بدك فكة لازم تشتري. بدك تشتري لازم تدفع الأسعار بعد التعديل.
وصباح الخير يا غزة.
تفضل يا سواق. شو بتفكر حالك فصيح؟ إنت الإيجار بالنسبة لإلك كمان شيكل زيادة. بس يا عمي هم قالوا... قالوا والا ما قالوش، مش عاجبك انزل. لا والله عاجبني، أحسن من الوقفة على الطريق.
صباح الخير يا غزة.
أنا اللي اشتريت تنكة السولار بأربعمية شيكل، وبعدين أعطاني إياها ناقصة التلت، وقالي: إزا مش عاجبك صف على جنب الطريق.
صباح الخير يا غزة.
يو! إنت لسه واقف على الطريق؟! وكيف متحمل ريحة السيرج المحروق؟! إنت مش مخنوق؟! يا راجل روح نام أحسنلك من وقفة الطريق..
تصبحي على خير يا غزة.